قال الرئيس عبد الفتاح السيسي، إن قانون الخدمة المدنية الجديد، به إجراءات لضبط الأداء،  مضيفًا: "يبقى النهارده ينفع إن واحد ياخد استروكس ويركب قطار ويسير صاروخ طاير على الأرض يفجر الدنيا ويضيع ولادنا وأهلنا".

وأضاف الرئيس السيسي خلال الندوة التثقيفية للقوات المسلحة بمناسبة يوم الشهيد: "أنا بقول الكلام ده لأن إحنا مش هنسمح وهنحاسب بالقانون اللي إحنا ارتضينا بيه ووافق عليه مجلس الشعب وقال إن اللي بيعاطى مخدرات يتم إنهاء خدمته فورا".

وتابع: "التحاليل اللي هنعملها هتتنفذ بصدق لأنها أمانة، ولما تتعمل ويطلع في حد بيتعاطى .. ما نقولش أصل عنده أولاد .. طب واللي ماتوا دول في محطة مصر هل ما عندهومش أولاد ولا أهل ؟ أكيد عندهم". 

وحول ما أشيع عن اللواء كامل الوزير، قال السيسي "من ضمن الشائعات أن البعض قال أننا تحايلنا على كامل الوزير منذ 5 أيام.. هو إحنا عندنا فى الجيش ياكامل بنتحايل على حد؟.. كامل قال لى أنا تحت رجل مصر فى أى وقت، بس كان لازم موافقة البرلمان، وهو فى إجازة الآن.. دى الحقيقة يامصريين.. لازم البرلمان يوافق على الوزير اللى نرشحه ثم يحلف اليمين.. طيب البرلمان فى إجازة".

وأضاف:" أعطى لهذا المرفق واحد من أحسن ضباط الجيش.. وحجم الجهد الذى يقدمه لصالح المشروعات القومية أكثر من هائل وضخم جدًا.. وإحنا عاملين شغل يخلص 30 يونيو 2020 بتكلفة تصل لـ 4 تريليون جنيه، نصفهم خلص والباقى جارى استكماله.. الدولة بتحارب الإرهاب وتقاتل وتنزف دم وتشتغل.. يد رافعة السلاح ويد تبنى ومش هتقف".

وتابع:"حجم التحدى كبير والناس تستعجل النتائج، وبالتالى قلنا كامل الوزير يتولى مسئولية النقل، والهيئة الهندسية بها ضباطها اللى يكملوا الشغل، ويتولى المهمة.. وأنتم سترون مرفق كالحديد فى 30 يونيو 2020.. وبقول لكامل: لك كل الدعم منى ومن المصريين والجيش والشرطة وأجهزة الدولة لينجح هذا المرفق، ولو عاوز ضباط لصالح الورش وكل ذلك معنديش مشكلة، ولا أعتقد أن وزير الدفاع سيبخل عنك او عن مصر.. كان عندى مشكلة كهرباء وغاز وشبكة قومية للطرق وبفضل الله خلصتها.. كان لازم نعمل كدا ونتحمل تبعاته وتزعلوا من السيسى ميجراش، لكن المهم البلد تعيش.. فالفكرة مش لأجل خاطر نعيش نضيع شعب".