(صفحة هزلية )

البستان 

(البستان مليان أشكال وألوان اشي حكم وأمثال واشي موال واشي وهم وخيال)

* يا جماعة المسيحيين جابوا هدف التعادل .. يا أمة ضحكت من جهلها الأمم

سيداتي انساتي سادتي السلام عليكم ورحمه الله وبركاته؛ ننقل لكم مبارة كرة القدم بين فريقي المتشددين والتنويرين على الأضواء الكاشفة باستاد أرض التكفير الدولي، وزي ما إحنا عارفين فيه حالة شحن وطحن ومحن بتميز لقاء اليوم .. اذّكر حضراتكم بالماتش اللي فات واللي اتلعب على أرضية ملعب (محدش سامع التاني)، وانتهى بحالتين طرد، وتفجير، وتكفير، وشوية إصابات فيس بوكية وبلوكات جماعية.

أنا شايف الفريقين في حالة غيبوبة؛ قصدي في حالة نشاط ملحوظ .. خاصة بعد التعاقدات الجديدة .. فريق المتشددين نازل بتقله يا جماعه.. والتنويري بيعلن عن نفسه.

هنبدأ إنشاء الله بنشيد الفريق المتشدد 

(المتشددين اهما .. حيوية وعزم وهمة .. جيل بعد جيل متأخرين .. المتشددين المتشددين). 

ثم نشيد الفريق التنويري 

(رجعوني عينيك لتنويري اللي راحوا

علموني اندم على الماضي وجراحه 

اللي شفته قبل ما تشوفك عنيا 

عمري ضايع في قضايا "الحسبة" يحسبوه إزاي ازاي عليا)

أنا شايف حكم المباراة هيقف دقيقة حداد على روح الكاتب الكبير حمدي أبو جليل.

وفاة "أبو جليل" هتربك حسابات الفريق التنويري .. والفريق أصلا كان محتاج (سنتر هاف باك فرود)، وحارس مقابر؛ قصدي حارس مرمي .. عموما مش هتفرق كلهم أموات .. 'أبو جليل" كان مجننهم يا جماعة .. افتكر لما حد ما بيقراش، وكان يطلب منه رواية من رواياته؛ كان يقوله: (قول والمصحف هتقراها)، وطبعا مكنش بيقراها.

الفريق المتشدد بيلعب بخطة دفاعية رجعية قوامها متفكرش .. لكن المدير الفني للفريق المتشدد محضر مفاجأة "قنبلة" .. خطة ملهاش حل ( ١١ - صفر - صفر) موقف الفريق كله على خط المرمى، وما فيش لا خط نص، ولا هجوم، ولا جناحات، ولا صدور، ولا اوراك .. لانها حرام.

والفريق التنويري كالعادة بيلعب بخطة هجومية ملهاش أي لازمة وبتعمل أزمة، ومع كل هجمة مرتدة واحد منهم يتقفش قصدي يتكسر. بصراحة مجازفة كبيرة من المدير الفني للفريق التنويري انه يلعب بخطة (صفر - صفر - ١١) كده لا فيه حارس مرمي، ولا دفاع ولا أي خطط فكرية وكله مهلبية. 

أنا شايف الفريق المتشدد بيبدأ بضربة البداية، وبدأ بهجمة مرتدة، وماشي "بساتر العورة" يا ساتر عليك .. جاحد يا ابني .. فكرة متكلفة .. عدا من واحد والتاني .. قطعها الفريق التنويري، وشاطها في السرة .. "الساتر" طلع مش بيغطي السرة .. طلعت اوت من المتشدد .. خدها الفريق التنويري، ورماها في حجر التطور .. عدا من واحد والتاني المدرجات نار .. أنا شايف فرحة عارمة وسط مشجعي الفريق التنويري، واللي زيهم زي مشجعي الفريق المتشدد، وكلهم على بعضهم بربطة المعلم مش فاهمين أي حاجة في التطور، وهو أي مكايدة والسلام، وعلى رأي عم أحمد فؤاد نجم (كله منهو بفتوتين) وشاط التنويري. ياخسار جت في القائم. مازال الفريق المتشدد مسيطر على وسط الملعب .. المنابر والميكروفونات والسرادقات، وهات وخد وخد وهات، وعدى من مؤتمر والتاني، والأدباء والمثقفين في العسل نايمين، وبينهم أي سجال، والهيني بالبليلة وعبده القال .. لسه المثقفين نايمين جوا أندية الأدب اللي عفى عليها الزمن، وماشي المتشدد، وعدى من الأدباء اللي كل همهم الصور واللقطة. الله يرحمه الكاتب الكبير محمد عبد المنعم زهران قالها حكمة والله (أندية الأدب بتلعب في الوقت الضايع). خطفها من رجل المتشدد الفنان محمد صبحي، ورماها في ملعب وزيرة الثقافة، وقالها انتى فين؟

 قطعها المتشدد مرة تانية .. ايه ده .. أنا شايف مشجع غشيم رمى شمروخ في الشات وشتم .. لأ يا جماعة عيب كده ميصحش .. متربيناش على كده. لازم الأمن يتدخل، ويعالج الأمور بحكمة شديدة لتهدئة الأجواء الملتهبة .. أنا شايف الأمور هديت بشكل غريب عجيب مريب سريع مريع يمكن عشان المشجع ابن مشجع مهم .. إيه ده؟ فيه مشجعة غيرت فريقها، وراحت للفريق المنافس، وسط هتافات الفريقين .. أسوان مولعة يا جماعة .. إحنا أخوات يا جماعة .. اوبا أنا سامع مشجع بيقول الفريق التاني جاب هدف التعادل. تخيل يا عزيزي لما مشجع مصري يقول جابوا هدف التعادل .. متضحكش .. دا زي ما قال المتنبي (ضحك كالبكاء) هي بقت إحنا وهما وهما وإحنا!! يا جماعة في أي دوري محترم أي حد من حقه يشجع أي فريق، ويروح أي فريق بدون خوف ولا تخوين ولا أي إحساس بالعار المجتمعي. سامع حد بيقول: دا لما يكون يكون فيه عدل ومساواة ولوايح .. واضح أنه الكل بيلعب من تحت الترابيزة، وفيه صفقات مشبوهة وسماسرة .. لازم اتحاد التكفير الدولي يكون له وقفه، ويقفل الدوي ونخلص خالص. أنا شايف لاعب تنويري خدها وقال (نسويون عند الشقط .. يساريون عند الدفع.. إسلاميون عند الميراث .. دولجيه قبل الكمين). قطعها منه المتشدد خطفها تنويري حيادي، وقال مسيحيين مؤيدين للشريعة "فقط" وقت الميراث. الماتش كده مقفول، ولازم مفاتيح لعب. حكم المباراة بيبص في ساعته .. ويطلق حكمنا الدولي "زمارة" نهاية المباراة .. ويخرج كل فريق معاه نقطة واحدة ويظل موقف الفريقين في الدوري شديد الصعوبة خاصة في ظل حالة التربص والتجسس والترقب والعنصرية المتبادلة.

فوق البيعة

* حفلة ترافيس سكوت وأم كلثوم ومن كل فيلم أغنية 

فوق البيعة مصطلح لم يعد له وجود ولكنه رجع تاني عشان يقولك ان المحامي عمرو عبد السلام صاحب دعوي إلغاء حفل ترافيس سكوت كشف خطورة تواجد مطرب الراب في مصر، والسبب هو دعم "ترافيس" للماسونية العالمية .. طبعا حضرتك مش عارف إيه هي الماسونية، ولا أنا بصراحة!! وفوق البيعة يقال ان مطرب الراب الأمريكي من عبدة الشياطين (اللهم احفظنا) واَخر حفل أقيم له في الولايات المتحدة كان من أكثر الحفلات دموية، وحصلت مجزرة وقتل فيها 10 أشخاص، دا غير الجرحي، وبيقال ان السر في كل ده الطقوس الشيطانية التي يؤديها، وفوق البيعة سمعت ناس بتقول: خليه يعمل الحفلة .. أهو عددنا يخف شوية ونريح الحكومة مننا !!

خاصة لما عرفوا ان "ترافيس" رفض وقف الحفل، وقال: أنا لو وقفت الحفل حياتي هتبقى مهددة بالضياع .. ومن جانبه نشر "ترافيس" تغريدة قال فيها: لا أطيق الانتظار لرؤيتكم.

وتعد هذه التغريدة بمثابة عودة ترافيس سكوت لاستخدام موقع “تويتر”، بعد انقطاع دام ١١ شهرا". الغريب ان التذاكر نفذت بعد نصف ساعة فقط من طرحها، نظرا لشعبية المغني الكبيرة في مصر وحول العالم .. ومن الواضح اننا بندن في مالطة.

 ومن كل فيلم أغنية

في الوقت اللي بنتابع فيه خناقات الملحن عمرو مصطفى مع كل خلق الله، وخناقة المطرب علي الحجار مع المطرب مدحت صالح على فكرة التراث الموسيقي، واللي "الحجار" بيقول انها فكرته، و"صالح" خطفها منه، وصورة إيمان البحر درويش، وفوق البيعة خناقات المسرحيين والسلفيين والتنويرين والمسيحيين، وفيديو "أبو العينين" وهو نازل من عربية في مونت كارلو .. والكباري والطرق والتطور والتأخر والطلاق .. يتصدر مواقع التواصل الاجتماعي شارة بداية الانمي الشهير المحقق "كونان" ولكن بصوت "أم كلثوم"! حيث تم استخدام تقنية الذكاء الاصطناعي، وتم استبدال المغنية لشارة كونان رشا رزق، بصوت كوكب الشرق أم كلثوم .. وطبعا حصل حالة جدل كبيرة جدا ..دي الست أم كلثوم برضوا!! 

يرد المتشدد: ياراجل دي رجال الدين بتتشتم وبتقفوا ساكتين .. اتحمقتوا قوي على الست .. ده حتى صوتها عورة!! على أية حال ليست هذه هي المرة الأولى التي يتم خلالها استخدام صوت أم كلثوم؛ فقد فعلها من قبل الملحن المصري الشهير عمرو مصطفى، وخليني أقولك فوق البيعة إن الكاتبة والممثلة الكوميدية الأمريكية سارة سيلفرمان رفعت دعوى قضائية على شركة "أوبن أيه آي"، وهي الشركة المصنعة لنظام الدردشة "تشات جي بي تي" والشركة العملاقة في مجال التكنولوجيا "ميتا" بزعم انتهاك حقوق النشر الخاصة بها.

الشركة امتنعت عن التعليق، ولم ترد شركة وعلى نظام (سكتناله دخل بحماره) قام مؤلفان آخران برفع هذه الدعوى القضائية الجماعية، وفوق البيعة خليني اقولك إحنا بعاد قوي يا جماعة

وسط البلد

(من كواليس السلطة والفن والحياة وبعض مما كان)

* نحن أم الخليج .. طبعا عربي كمال

لو تعتقد أن سؤال (نحن أم الخليج؟) سؤالا اكلاشيهيا استفزازيا أطمئنك إلى انه سؤال منطقي بديهي يناسب واقعنا وموضوعنا "سينما باب الحديد" المشروع الجديد الذي تحدث عنه الشاعر عربي كمال، ولا ندري مصيره؛ بالطبع أقصد المشروع؛ فما بين الوعود البراقة، والتسويف، والتعطيل، والتعتيم تاه الملف في دهاليز الروتين ..تخيل لوكانت هناك سكة حديد في دولة من دول الخليج؟! .. تخيل لو كان لديهم يوسف شاهين، وعبد الحي أديب، وهند رستم، وفريد شوقي، وسامي البارودي .. تخيل لو كان لديهم نيجاتيف وصور وأفيشات فيلم باب الحديد (كان زمانهم عاملين متحف على أعلى مستوى) ونحن أصل التاريخ في كل شيء لا ندري شيء عن أي شيء! تخيل لو كان عندهم مدينة بحجم وتاريخ وعراقة وأصالة مدينة الإسكندرية؟! تخيل كيف مر على العالم يوم ٦ يناير ١٨٩٦وكيف مر علينا؟! في هذا اليوم عُرض أول عرض سينمائي في مقهى "زوان" بالإسكندرية، وفي 12 يوليو 1851 وقَّع الخديوي "عباس"، والمهندس الإنجليزي "روبرت ستيفنسون" عقدًا يتضمن إنشاء ثاني خط سكة حديد في العالم يربط بين القاهرة والإسكندرية، وبذلك امتلكت مصر ثاني محطة سكة حديد في العالم بعد المملكة المتحدة، ودارت عجلات القطار، وعلى صوت صفيرها ودخانها، ومن شبابيكها شاهدنا أعظم الأفلام المصرية؛ أذكر منها فيلم"يحيا الحب" إخراج محمد كريم؛ "سيدة القطار"؛ فيلم "موعد غرام" وفيلم "القطار" وفيلم "بطل من ورق"  وفيلم "المنسي" وفيلم "ساعة ونص"

 ولكن يبقى الفيلم الأهم "باب الحديد"، والذي يصنف كرابع أفضل فيلم في تاريخ السينما المصرية، ومن الجدير بالذكر ان (قصة وسيناريو الفيلم) استلهمها "أديب" من سكة حديد مدينة المحلة التي كان لها خطان للسكة الحديد، عكس باقي مدن مصر؛ حيث كان لكل مدينة محطة واحدة. كل هذا وغيره دفع "كمال" ليقدم  بمشروعه الضخم للمسوؤلين؛ يتلخص المشروع في  إنشاء قسم في متحف هيئة السكة الحديد يكون عنوانه "سينما باب الحديد" يضم المتحف كل الأرشيف السينمائي لسكك حديد مصر .. فكرة جبارة تحتاج إلى رؤية، وتخيل معي ماذا لو كانوا مكاننا!
-----------------------------------
يكتبها ويحررها: مينا ناصف
من المشهد الأسبوعية