أكد الرئيس عبد الفتاح السيسي على ضرورة الحفاظ على ما تم إنجازه خلال السنوات الماضية، قائلا: إن ما تم إنجازه لا يمكن التفريط به، إن مواردنا محدودة جدا ولا تكفي كل شيء، وأن الحل هو في زيادة معدلات التصدير ومساهمة الصناعة في ذلك من أجل التغلب على مشكلة ارتفاع سعر صرف الدولار.

وأضاف الرئيس السيسي  خلال لقائه عددا من المسؤولين والإعلاميين مساء اليوم الأربعاء، على هامش الاحتفالات بالذكرى 72 بعيد الشرطة،  أننا كنا نستهدف أن نرتفع بمعدل التصدير إلى 100 مليار دولار، ولكن هذا لم يحدث بسبب الضغط على فاتورة الاستيراد من الخارج.

ولفت الرئيس السيسي إلى أنه منذ عام 2011 وحتى الآن زاد عدد السكان بحوالي 26 مليون نسمة وهي زيادة سكانية لها متطلبات ضرورية ولا بد للدولة أن توفرها.
وبشأن التحديات أضاف، : "في دول قعدت مشكلة الكهرباء فيها لغاية دلوقتي بقالها 30 او 40 سنة لانهم مشيوا في مسارات وأولويات أخرى .. الأزمة اللي عندنا مش فكرة توصيفها وانما حلها بما يتفق مع طبيعة ظروفنا … يعني هل المصريين كان ممكن يستحملوا عمليات إرهابية ضد الدولة المصرية علشان مانصرفش 120 مليار جنيه ؟ .. دولة زي مصر محتاجة أرقام كبيرة جدا للانفاق عليها .. يا اما نفضل نضحي لحد ما نوصل لأرقام ترضينا كلنا يا إما مش هنستحمل ونتسبب في خرابها كلنا".
وتابع قائلا: "لو انت ماخدتش بالك الموضوع هيترتب عليه مشكلة كبيرة جدا كلنا هندفع تمنها.. عندك عدد كبير من الناس ومواردك محدودة جدا .. احنا زدنا 26 مليون نسمة من 2011 حتى النهاردة .. هل ده رقم ملوش تأثير وملوش مطالب في كل شيء وكل قطاع ؟ .. هل هي كانت أزمة اولويات ..؟ لا ..".
وقال الرئيس السيسي في شرح الأوضاع المصرية: "انت كنت عايز تقفز بالناس من الحالة المعنوية حالة الإحباط وعدم الثقة لحاجة تانية .. الأمور كانت ماشية كويس لغاية 2020 .. وكان معدل النمو أكثر من 6% .. نمو مش لطبقة وانما للكتلة الغالبة .. اللي بنستهدفها دايما اللي هو الغلبان .. أي مسئول عينه على مين ؟ على الراجل المستور أو الأسرة الغنية .. لكن الغلبان هيجيب منين وهيصرف ازاي ؟".
وأضاف: "الفكرة كلها ماكنتش أبدا أزمة اولويات .. لأن الموضوع كان واضح انه لابد للدولة دي تتماسك .. لو حليت أزمة الدولار في مصر ولا يهمني أي حاجة تانية .. الأزمة دي حلها حاجة واحدة بس .. هو فرض الحل علينا .. لحل الأزمة بشكل نهائي .. يعني المطلوب في مدة قصيرة نصل بمعدلات التصنيع في مصر بشكل يخلي هناك إتاحة للدولار بشكل طبيعي".
وبشان تطورات الأوضاع في المنطقة، تابع الرئيس السيسي : "نبذل جهد كبير جدا لمنع اتساع الصراع في منطقة الشرق الأوسط.. حريصين على أن نعمل على إطفاء الحرائق وليس إشعالها.. شكل النتائج آخر 4 شهور كانت قاسية على الجميع".
وأضاف: "في السودان بنبذل جهدنا وفي ليبيا نبذل جهدنا .. وفي الصومال قولنا احنا مع أي عمل دبلوماسي أو اتفاق بين أثيوبيا ودول الجوار زي الصومال وكينيا وجيبوتي .. كل الدول دي لها موانئ سواء على المحيط أو البحر الأحمر".
وتابع: "اللي انت شايفه في العالم كله هو نتاج حراك عالمي والتداعيات تطالنا بشكل أو بآخر .. لو فيه أزمة أو محاولات التأثير على مواصلات التجارة .. بيكون لها تداعيات اقتصادية وأسعار ترتفع .. تأثرنا سلبا"..
وقال الرئيس السيسي: "بنبذل جهد كبير جدا لوقف إطلاق النار في غزة .. والرهائن يتم إطلاقهم والسجناء يتم إطلاقهم .. وندخل في مرحلة إعمار ما بعد الحرب .. إحنا كدولة جزء من العالم بنتأثر بالحراك اللي موجود في العالم لتشكيل عالم جديد ".