نفسي احكي لاي حد بيقلي نحن حاسين فيكم؛ اقله تعال حس عالمزبوط الاحاسيس التالية:
احساس انك تنام بخيمة
طيب بلاش خيمة، تنام بغرفة وحدة صغيرة برفقة ١٠ اشخاص نصهم أطفال، و هادي الغرفة هي غرفة الغيار وغرفة الاكل وغرفة النوم وغرفة المعيشة و المطبخ واحياناً بنحمم الولاد بنفس الغرفة
فش خصوصية.. انسى الخصوصية
انت حتى ما بتحظى بفرصة انك تتواجد لحالك بالغرفة تغير ملابسك.. اه والله غيّر ملابسك قدام الكل وتعال قلي قديه حاسس فينا
تعال اقف في طابور الحمام خصوصاً الصبح قدامك عشرة عشرين وراك عشرة عشرين
اجا دورك تفوت يلا يلا تلحق تعمل شي واحد فقط
شي واحد
تقضي حاجتك او تغسل وجهك زي العالم و الناس او تنضف اسنانك
وصدقني ممكن تكسب وقت اكتر لو فات معك حد تاني عالحمام و تتبادلوا الادوار مهو مفيش خصوصية
اه والله
استنى.. الحمام غالباً ما فيه ماي
دبر حالك جوا
و تعال قلي قديه حاسس فينا
جرب تشتهي اكلة.. مهما كانت بسيطة
بلاش انت.. جرب شعور يطلبوا ولادك منك اكلة بسيطة خبزة ولا بيضة ولا تفاحة
و ما تقدر تجيب
ما تقدر تجيب لان معك مصاري الدنيا و بطل الها قيمة
و ما تقدر تجيب لان ما معك مصاري
و ما تقدر تجيب لان أصلا ما في شي تجيبه
جرب احرم حالك او اشتهي شغلة لشهور وتعال قلي قديه حاسس فينا
جرب تنام بنفس اللبس وتصحى بنفس اللبس و تطلع بنفس اللبس وتاكل بنفس اللبس وتعمل كل شي بنفس اللبس
لييييه؟ لان فعلياً انت محظوظ اذا معك غيارين! ومحظوظ اكتر لو قدرت تشتري واذا اشتريت رح تشتري لبس ولادي لبنتك و لبس رجالي لمراتك المهم تدبر حالك و تستر حالك..
جرب تموت من البرد لان ما معك لبس شتوي و مش لاقي لبس شتوي وتعال قلي قديه حاسس فينا
جربت تكون مراتك حامل في شهرها بالحرب!!
جربت شعورك او شعورها كيف هتروح تولد في نص الليل ولا تحت القصف
جربت تطلع مع مرتك الحامل!! جربتي تكوني حامل بالحرب
كيف شعورك وإحساسك!!
عارف انه انقطع حليب الامهات من صدورهن بسبب الخوف وقلة الاكل!!
طب جربت شعور ابنك ينولد في حمام او في سيارة او في الشارع او في خيمة؟ تخيل لو كان ابنك البكر
جربت شعور ما تلاقي لبسة وحدة لابنك المولود؟؟
جربت شعور ما تلاقيله بامبرز؟
جرب شعور انه ابنك ينلف بوجه فرشة ولا اسدال صلاة لان مو لاقيله كفولة ولا حرام وبعدين تعال قلي قديه حاسس فينا
جربت تحتاج دوا و ما تلاقيه !!
جربت تكون عندك مرض مزمن
أمك عندها مرض مزمن
أبوك عنده مرض مزمن
ومش لاقي دوا
وعايش عالبدائل
و صحتك بالنازل!!!
جرب عيش هاد القلق و تعال قلي قديه حسيت فينا
قال والله نحن حاسين فيكم!! شو حاسين بالضبط!!
وجرب ما تطلع مطاعم
جرب ما تصحى تشرب قهوتك
جرب ما تروح شغلك وتمارس حياتك كإنسان
جرب تفقد مصدر رزقك
جرب ما تاكل غير معلبات لأسبوع مش لشهور
جرب ما تمشط شعرك كل يوم ولا تتحمم ولا تتعطر
جرب شعور ما تعرف شي عن أهلك وعيلتك وحبايبك بالأيام والاسابيع والشهور
جرب تفقد حبايب قلبك عيلتك ناسك وأهلك
جرب تنحرم من شغلك وكيانك
جرب تنسى إنه انت كان عندك شغل و كيان
جرب تنسى إنه عندك سيارة وإنك ابن عز
جرب تنسى إنه عندك حياة
جرب تنحرم من إنسانيتك
جرب تنحرم من مستقبلك
جرب تنحرم من حقك
جرب تنظلم
جرب تنذل .. آه تنذل
جرب يعايرك حد
جرب شعور تنام عصوت الزنانة
جرب شعور تصحى على ابنك بنص الليل بيرجف وهو نايم من الخوف والبرد
جرب تنحرم ترتاح ساعة واحدة لحالك
اه والله
و تعال قلي قديه حاسس فينا
-------------------------
بقلم: حمادة حمادة
