ايوه احنا محتاجين .. عمرة.. بالضبط زى العربية .. اللى جابت أخرها . ولا حتى الغسالة .. اللى بقت ولا بتشطف . ولا بتنشف
ايوه .. أحنا أكل منا الزمن وشرب . وعاملين نفسنا .. ميت سبع برومبة فى بعض . وال أيه .. ما جابيتناش ولادة
ايوه .. أحنا نستاهل يتقال لنا .. جاتكم بدل الوكسة ميت .. قول ألف وكسة
قعدنا . ورحرحنا . وشربنا الشاى أبو ياسمين اياه
وأطرقع لينا .. على قفانا
ولسه بنقول .. كمان
أنتو ولا مؤاخذة .. ما بتحسوش
ولا الحكاية.. أدينا بناكل ونشرب وننام ونتمطع.. زى باقى البنى ادمين
القصة مش كده
القصة أن أنا وأنت وهى وهو
كلنا اصابتنا .. البلادة والكسل والخمول اللذيذ
بقينا .. لا فعل . ولا حتى رد فعل
بقينا زى العرايس الماريونيت .. اللى بيحركوها.. بالريموت كنترول
وعلى رأى عادل أدهم
روح يا زكى قدرة
تعالى يا زكى قدرة
أنا عبد المأمور يا بيه
والمأمور فرحان باللعبة
ومفيش أحسن من كده .. ويجعله عامر علينا.. وعلى السامعين
ويكفينا شر الحوجة
وقولة : مفيش
وأجيب لكم منين
أنتم البعدا .. ما بتحسوش ؟
مرة تانية وتالتة ورابعة
أحمدوا ربنا .. على الهنا اللى أنتو فيه
دول فى سوريا والعراق
ما بيقطعوش نور
دول بيقطعوا .. رقاب
أحمدوا ربنا أنكم عندكم اكتر .. من بابا وماما
وصدور .. ومش صدر واحد.. بيحن عليكم
ربنا يخلى لكم
هيفا وصافيناز
و و و و و
وباقى النعم اللى لازم تتباهوا بيها .. أمام باقى الأمم
عارفين أيه اللى ناقصكم
اللى ناقصكم بحق وحقيق
أنهم ينكدوا عليكم ..زى باقى خلق الله
ويقرفوكم
بالديمقراطية
والمهلبية
والعدالة الأنتقالية
والفول اللى .. من غير تقلية
ساعتها
حتحسوا بالفرق
وحتبوسوا أيديكم .. وش قبل ضهر
ويا دى النعيم اللى أنت فيه .. ياشلبى ؟
##
