اترسخ في عقيدة الأجهزة الأمنية عموماً ان الفضايح الجنسية أهم أسلحة الحروب ضد الناس الوحشين اللي بيكدروا الأمن العام وبيهددوا نظام الحكم ، أو بيشتغلوا على اجندات خارجية ممولة من جهات مشبوهة ، ده الفصل الأول في كتاب كيف تكون أمنجيا ناجحاً ، اللي بيوزعه عليهم الصول نيازي في بداية الإعداد والتربية الأمنية .

علشان كده نقدر نتوقع حملات وحروب من النوع ده ضد خالد علي ورجالته مثلاً في الفترة الجاية 

أو نقدر نفهم سر الحملة الكبيرة اللي اتعلمت على مواطنة محترمة غلطت لما اتصورت بمايوه على البحر .

دي طريقة الأمن اللي هو عصب النظام في التعامل مع معارضينه والناس الخونة اللي قلبهم مش على البلد ..

اللي تغلب به العب به

( 1 )

من فترة أيام مبارك كان فيه شخص محترم ودماغه ناشفة حبتين مسك بالصدفة منصب محافظ في الصعيد .

الراجل ده اول ما استلم شغله لقى الدنيا كلها زروطة فساد ، والبلد بفلوسها ومصالحها في ايد عصابة اعضاءها مجموعة من اصحاب الشركات مع مسئولين كبار في الجهات النافذة زي الأحياء والمحافظة والاسكان وخلافه ...عصابة عصابة يعني .

حاولوا يعملوا معاه زي اللي قبله ، لقوه رخم ودمه تقيل وعايز يقلب بايديه شخصيا في عفن الفساد اللي ضرب بجذوره في البلد ، ولأنه كان أصلاً أصلاً مسئول مهم في جهاز أمني (محترم) وعنده خبرة وقوة شخصية وجرأة في التعامل مع الأشكال دي ، قرر يدخل المعركة من غير أي تردد .

وبدأ يعزل ناس ويحول ناس للتحقيق ويمشي مشاريع في البلد زي مابيقول القانون ، ويفتح مكتبه قدام الكل ، يعمل اللي المفروض أي مسئول يعمله طبعاً ..بس تفتكروا العصابة هتسكت؟

هتسيبه يدخل أغلب أعضاءها السجن ويفضحهم بعد كل ده ؟

(2 )

اذ فجأتن ..لقيت قدامي في جرنال  كنت بشتغل فيه وقتها ملف كبيير جاي من مكتب رئيس التحرير عليه العبارة الشهيرة ..استاذ فلان ..هام وعاجل جدا ..صفحة 3 !!

قلبت في الورق لقيت ملف تقيل الصراحة عن فضايح جنسية لمسئول كبير

مين ياترى ..؟

المحافظ اياه .

مش كده وبس ده متهم في فضيحة مع موظفة كبيرة جوزها رافع عليه قضية زنا...

وقتها ولا كنت اعرف الراجل ولا الحكاية ..

لكن لما لقيت نفس التفاصيل تقريبا جزء من حملة كبيرة بتشنها جريدة الجمهورية والمساء بدأت اقلق ..وافحّر ورا الموضوع علشان افهم .

وكانت النتايج كالتالي..

العصابة مالقتش مسكة للراجل غير انه بيحب الستات ، ولطيف وبرنس كده معاه ..

وكان بيلعب تنس مع موظفة كبيرة في المحافظة ، كانت متجوزة واحد وانفصلت عنه من فترة طويلة وماشيين في اجراءات طلاق .

الواحد ده من العصابة والمحافظ وقفه عن العمل وحوله للنيابة اللي حبسته على ذمة التحقيق .

قوووم ايه ..راحوا للمحبوس ده واتفقوا انه يرفع دعوى زنا على مراته علشان الحبكة تكمل.

والزملا في الجمهورية والمسا ماقصروش الصراحة

والظرف اللي كان مركون في الدرج عندي كان فيه نسخ منه في جرايد تاني قامت بالواجب..بس كل جريدة وطريقتها

لما كنت بكلم المحافظ في الموضوع وقلت له ممكن رئيس التحرير بتاعي ينشر الموضوع عن طريق حد تاني زي مابيعمل أحياناً ...ضحك وقال بكل ثقة ..

انت بس قول له فلان الفلاني بيسلم عليك

وهو مش هينشر حاجة

وده اللي حصل.

( 3 )

نفس دروس الصول نيازي هي اللي استخدموها مع عبد الحليم قنديل مثلا وقت ماكان أهم معارض لنظام مبارك ، الاول نشروا له فيديو عادي مافيهوش حاجة وهو بيهزر من واحدة من الكوادر السياسية المحترمة ...ومجبش نتيجة

بعدين خطفوه في عربية ورموه عريان فيا لصحرا قرب الدائري بعد ما قالوا له مايجيبش سيرة جمال مبارك تاني ..

وقيس على كده اللي اتعمل مع خالد يوسف مثلا من فترة ..

( 4 )

وبمناسبة المحافظين كان فيه محافظ من الوزن التقيل جاي من جهاز أمني رفيع وماسك محافظة مهمة ، وبعدها مسك محافظة تاني أهم منها سنين طويلة.

الراجل ده حصلت في عهده مع المحافظة الاولانية واقعة محدش انتبه لها الا على مستوى ضيق في المحافظة نفسها ..

الشهود على الواقعة وسلوك الراجل عموماً كان منهم شاعر عظيم راحل وقيادي له في العمل السياسي علامات ..وواحد من قيادات نادي مهم ...واتنين تلاتة من مثقفين البلد ...وتبادلوا رواية بعض التفاصيل...

الواقعة كان ملخصها حبس مسئول في جهاز تبع الاتصالات بعد اكتشاف انه بيتصنت على عدد كبير من الناس المهمة في البلد ، نقدر نقول اغلب سكان البلد كانوا تحت المراقبة ومكالماتهم متسجلة ، وان فيه تقارير بملخصات الكلام المهم بتروح للسيد المحافظ يوميا او اسبوعيا ..

لكن فيه تفاصيل تاني كانت بتقول ان سيادته كان بيحب يلاعب الناس بحكاية الفضايح الجنسية ولدرجة ان حد من اعضاء مجلس محلي او برلمان كان عامل له صداع وبينهم قلق على مشروع مهم في البلد ..

يخلص عليه ازاي ..

عرف يسجل فيديو لبنته في اوضاع مش تمام مع حد ، متعرفش كان مزقوق عليها ولا صدفة..بس المهم الشريط ..

جاب ابو البنت مكتبه وفرجه على الشريط

والراجل حصلت له ازمة قلبية والموضوع خلص على كده ..

في أمثلة تاني كتير بس للأسف مينفعش تتقال .

( 5 )

نروح على حكاية تاني ابطالها معروفين ومشاهير ومنهم رجال أعمال وسياسيين كبار، وأعضاء برلمان سابقين ايام مبارك وواحدة ست مشيها بطّال ..

اللي يهمنا عضو برلمان هو مش معارض أوي بس كان لبط وعامل مشاكل لبعض دواير النفوذ في البلد ، وكمان صوته عالي نظراً لأنه اصلا اصلا متربي في جهاز أمني قبل ما يتحول لنجم جماهيري سياسي وعضو برمان بينجح من اول جولة الساعة 12 الضهر .

بس رغم مظاهر التدين بتاعته كان بيحب الستات ..

وفي يوم كان في محافظة ساحلية وراجع على القاهرة قابل بالصدفة صاحبتنا في فندق كبير وعزمها على الغدا

ثم عزمها على انها تروح معاه شقته في القاهرة ..

وحصل

والموضوع انتهى واتنسى

الست دي اصلا كانت على علاقة بأتقل ناس في المحافظة

اتقبض عليها في ورطة قانونية كبيرة ..

حاولت تستنجد بالناس اللي تعرفهم ولا حد عبرها طبعاً ..

لما زهقت قالت كل اللي تعرفه في محضر الشرطة  عشان تنتقم بالمرة وخلاص

وهي خارجة متكلبشة شافت محامي شغال مع راس كبيرة من اللي تعرفهم معدي بالصدفة..

قالت له قول لسيدك اني جبت اسمه واسامي الباقيين وعليا وعلى أعدائي.

بعد اقل من ساعة كانوا جايين لها علشان ينقذوها من ورطتها ..

قالت لهم بس هعمل ايه في المحضر .. دانا قلت اسامي وعناوين وتفاصيل ..

كان الحل انها تغير اقوالها قدام النيابة وتقول اتعذبت

بس الخدمة اللي قدمتها لهم انها ورطت اسم واحد بس ..مين ؟

ايوه ..الراجل عضو البرلمان بتاع القاهرة ..

ووصفت شقته بالتفصيل وراحوا عاينوا كمان

واتحط على صاحبنا ونفذ المطلوب منه علشان يطلع من الفضيحة

طبعا الموضوع ده هيفكرنا بالفيديو المشهور اللي كان بطله نائب في القاهرة برضه ، خصومه سلطوا عليه بنتين صوروه معاهم بالتفصيل الممل ووزعوا الفيديو في الدنيا كلها ..

ومن ذكاء خصومه خلوا البنتين يجروا شكله عشان يتكلم في تفاصيل شغله في المجلس.

( 6 )

حد فاكر كلام العادلي قدام المحكمة عن البنات والأخلاق والتجنيد ..؟

طب حاد فاكر كلامه وقت ماكان في عزه عن التصنت واللي خايف مايتكلمش؟

العادلي بالمناسبة أقوى وأهم ظابط أمن دولة عدى على تاريخ وزارة الداخلية.

هامش 1 :

زكي بدر الله يرحمه كان غاوي برضه موضوع رصد الفضايح لخصوم وحبايب البلد وقت وجوده في الوزارة ، وكان ماسك بلاوي على روس كبيرة ، معارضة على مثقفين على مسئولين ..

بس هو من غروره ..مكنش بيعمل حساب حد ..

كان مشهور الله يرحمه بانه بيشتم بالأب والأم عادي حتى رجالته

حتى في مجلس الشعب كان لسانه متبري منه ولا كان بيسكت

وفاكرين ان المرحوم أقيل فجأة بعد الزميل صلاح النحيف ما سجل له شريط الشتايم اللي الشعب نشرته وأحرجت النظام وقتها فاقالوه ..

بس اللوا محمد امام كان مدير مكتبه

ولملم كل الورق والتسجيلات المهمة وخفاها في بيته ( جزء م الكلام ده شهادات وجزء تخمين او تخيل او توقع )

وكان له ابن اسمه طارق ..لو حد فاكر انه اتحول لنجم الموسم وقتها وسموه شمشون مصر الجديدة ..

وهو وابوه للأمانة كانوا في منتهى الافترا ..

الاب اصلا كان له مشاريع ضخمة وشريك حوت مدينة نصر فوزي السيد

بس الأهم ان كان في بيتهم اوراق وتسجيلات تخص ناس تقيلة ..

بعد ما الصحافة " المحترمة" عملت اللي عليها وقدمت الرائد طارق للمجتمع باعتباره ارهابي خطير فظيع مريع ..

وبعد ما الاشاعات انتشرت ان فيه خناقة حصلت بينه وبين علاء مبارك بسبب هالة صدقي

واتقالت اشاعة تانية كان بطلها منير ثابت

وبعد ماطلعوا أمر ضبط واحضار للظابط وابوه

ماعلينا

المهم ان جيش عرمرم من الداخلية اتحرك على مصر الجديدة ..والشقة باللي فيها اتدمرت بالار بي جي ..وطارق وابوه ماتوا

وكل اللي في الشقة من ورق وتسجيلات اتحرق

وشكرا