اعرف ستات وبنات كتير بيتبهدلوا من أهاليهم أو جيرانهم او زمايلهم في الشغل ، من أي مجتمع بيتعاملوا معاه بس لأنهم بشعرهم مش بطرح ..
ودايما اللي بتفكر تعمل كده لازم يكون عندها حماية كافية علشان تعرف تكمل في سكتها ..باعتبار ان ده نوع من الحرية الشخصية أكيد ..
ولو انسانة طبيعية يعني ماعندهاش غير لسانها وقوة شخصيتها فبتعافر لوحدها وهي وطول نفسها ..يا بتنخ وتلبس طرحة يا بتكمل وروحها مليانة تعاوير..
بداية هي في نظر الكل ..واحدة مسيحية علشان مفيش مسلمة بتبقى بشعرها ..
او المجتمع المتدين فاهم كده ..
لو معاها عيال في مدرسة وفكرت تروح زيارة هناك ..هتقع وسط حفرة مليانة متدينين المؤدب فيهم هيزغر لها من بعيد وغالبا هفش بقية غله في ابنها ولا بنتها ..
ده كمان ممكن زمايل ولا زميلات ابنها ولا بنتها ياخدوا حقهم منها بطريقة أو بأخرى ..
المدرسة ..والشركة والمصالح الحكومية والتكاسي والميكروباصات
الجيران ..ده غير القرايب
مجتمع سانن ضوافره وأنيابه وجاهز انه يفتك بأي واحدة (أو واحد) بيتصرف في حياته وهو مقتنع ان ده جزء من حريته الشخصية ..
المجتمع ده دلوقتي زعلان ومنتفض وعروقه نافره لأن فيه قانون بيتجهز لحظر النقاب ..
وبعيد عن ان دي معركة خايبة وبتضيع الوقت زي اغلب المعارك اللي بتدخلها الدولة ..
آ بس السلفيين وكل اللي في الحفرة الكبيرة دي بوحشيتهم ونظرتهم الأحادية وانكارهم لأي حد يخالفهم ..واستعدادهم لقرقشته باسنانهم ..
هم هم اللي بيتكلموا دلوقتي عن حرية الست ..